DILI, 13 juñu 2023 (TATOLI) – Institutu Boaventura Timor-Leste (IBTL) kompleta ona kritériu tolu molok hetan avaliasaun institusionál husi Ajénsia Nasionál Avaliasaun no Akreditasaun Akadémiku (ANAAA) entre jullu no outubru tinan ne’e.

Reitora IBTL, Quitéria da Costa, hatete kritériu lubuk ida ne’ebé ANAAA submete mai IBTL mak atu prienxe iha sistema assesment report ne’e iha kritériu tolu maka kompleta ona hanesan estrutura kona-ba rekursu umanu, depozita osan IBTL nian rasik iha banku no submete dokumentu rai ne’ebé harii instituto refere.

“Iha kritériu barak loos maka ANAAA fó mai ami atu prienxe iha assesment report ne’e atu tama bá prosesu avaliasaun institusionál ne’ebé planeia ona atu realiza iha fulan-jullu to’o outubru tinan ne’e”, Quitéria da Costa dehan ba Tatoli, ohin.

Husi kritériu lubuk ida ne’ebé ANAAA fó mai IBTL atu kompleta ne’e úniku kritériu tolu mak antes ne’e institutu seidauk kompleta, maibé ho esforsu ne’ebé halo konsege kompleta ona buat tolu ne’e no agora institutu submete ona ba ANAAA hodi hein prosesu tuirmai.

“Ha’u la lembra detallu kritériu sira ne’ebé ANAAA fó mai ami atu prienxe tanba barak loos, maibé ha’u hanoin hetan de’it maka iha buat tolu ne’ebé ami tenke kompleta”, dehan dirijente eskola ne’e.

Nia lembra katak antes ne’e sira iha duni hanoin atu kompleta kritériu sira ne’e, maibé tanba preokupa ho atividade seluk no lakonsege halibur dokumentu relevante sira, maibé ho ANAAA ninia kritériu sira ne’e maka fanu sira hodi halo ezersísiu maka’as to’o kompleta duni asuntu importante sira ne’e.

Diretór-Ezekutivu ANAAA, Nilton Paiva, afirma avaliasaun institusionál ba IBTL ne’e loloos halo iha tinan kotuk, maibé adia tiha entaun tinan ne’e maka foin realiza. ANAAA sei halo avaliasaun institusionál ida ba IBTL no programa 32.

Nilton Paiva esplika katak buat ne’ebé IPBTL presiza halo maka tenke prienxe uluk self assesment report ne’ebé ANAAA fó, depois semana oin ANAAA bá haree kuandu kompleta hotu ona maka foin deside data fiksu ba halo avaliasaun institusionál dahuluk ba IBTL, nune’e bainhira sira hetan ona akreditasaun maka foin prepara fali avaliasaun seluk tuirmai kona-ba progresu sira iha kada programa ne’ebé eziste iha institutu ne’e rasik.

IBTL iha fakuldade rua mak ekonomia no tékniku sivíl ho nia estudante hamutuk 365, dosente permanente 44 no parte tempu lima.